لا تلومنى على صفعة أخذتها من لا إنسان
لوم إلى خلانى أروح لحظيرة إلا إنسان
الوطن 24/ كتب: هانى خاطر
كلكم بتلوموا وبتشتموا الشاب المصرى على شان قبل على كرامته إن الكويتى يضربه ووقف ساكت وإيده في جنبه بعد كل قلم مستني القلم إللي بعده !!
لعلمكم هو ماقبلش إنه يضرب ؟!.
هو محسش أصلا بالضرب ده !!
أصل انتوا ماتعرفوش حاجة ماتعرفوش إن هو وقتها كان بيفكر فى إيه ؟
فى الحلم إللى ضاع !
فى السجن إللى مستنيه لو رجع مصر!
فى حسرة أمه وصدمة أبوه!
فى كسرة أخواته !
محدش يكلمه عن الكرامة !!
هو اكيد خلص تعليمه ومكنش لاقى أى شغل اكيد هو فقير زينا والفقر بينهش فينا نهش الكلاب لا عارف يشترى قميص ولا عارف يشترى جزمة مش لاقى أى شغل ولما يلاقى شغل يادوب يكفى مصاريف شخصية .
– ويجى واحد يعرض عليك تسافر الكويت !!
عارفين كان المطلوب كام ؟؟؟
اكيد مبلغ كبير!
طب عارفين كان معاه منهم كام ؟؟؟
اكيد ولا مليم .
طبعاً ده حلم كبير هينقله هو وأبويه وأمه وأخواته من الفقر هريح أبويه وأمه و هيجهز أخواته البنات هيشترى إللى نفسي فيه زى حلم كل شاب .
طب عارفين جاب الفلوس دي إزاى ؟؟
اكيد ماعرفش يجيبهم طبعاً وهو إللى زي حلاتنا مين هيسلفه المبالغ الكبيرة ده .
اكيد زى كل الناس كتب بيهم إيصالات أمانة بالمبلغ وفوقهم إيصال على بياض .
محدش يتكلم عن الكرامة !!
عارفين يعنى إيه بدل ما يرجع لاهلة بشنطة هدايا يرجع لهم بديون وهم تقيل وهم أصلا ما عندهمش أي حاجة يبيعوها !!
هو ماحسش بأى ضرب ؟!.
هو كان متبنج ببنج الفقر وخراب البيت إللي منتظره .
الراجل بيضربة
وهو حر والشاب أجير .
هو قادر والشاب ضعيف .
هو فى بلده والشاب غريب .
هو صاحب البيت والشاب ضيف عنده .
– لا بس هو ماضربوش علي فكرة إللى كان بيضربه الفقر والعوزة والعجز والديون .
إللى كان بيضربه الراجل إللى طردة من الشغل في مصر .
إللى كان بيضربه إيصالات الأمانة إللي هيتسجن بسسبها .
إللى كان بيضربه الظلم والقهر .
اللى كان بيضربه الكوسة والمحسوبية إللي في بلدنا .
هو محدش ضربه … هو راح مضروب جاهز .
كتير منكم وهو بيقراء الكلام دا بيقول ممكن يكون الكلام صح لكن مفيش حد يقدر يتكلم لانه متبنج زى الشاب دا واكتر كمان .
