المغرب: المال السايب كيعلم السرقة. في إمارة فيصل العرايشي..” الحاكم بأمره” في القطب العمومي السمعي البصري.
الوطن24/ تحقيق: كادم بوطيب
فنانة أكل عليها الدهر وشرب خرجات مؤخرا عينيها فالمغاربة كتسنطح بلا حيا وبلا حشمة لي ماعجبوش الأعمال الرمضانية مايتفرجش، ويقلب لقنوات أخرى بحالا كتكلم على قنوات باها ماشي قنوات عمومية تمول من أموال دافعي الضرائب من المغاربة الأحرار…
خلينا من هاذ البوكيمونا ونرجعو شوية للوراء باش نفهمو أصل الداء…
فعام 1989 أسس فيصل العرايشي هو وشركاء آخرين شركة ديال الإنتاج السمعي البصري اسمها Sigma بشراكة مع رجلي الأعمال دينو السبتي ومحمد رزقي، وبقاو شركاء رسميين حتى لعام 1999، العام لي غادي يتعين فيه العرايشي رئيس مدير عام ديال الإذاعة والتلفزة المغربية.. وبطبيعة الحال ما كانش ممكن فيصل العرايشي يكون هو المسؤول الأول على الصرف فالإذاعة والتلفزة، وفنفس الوقت يبقى أحد ملاك شركة إنتاج خاصة كتستافد من فلوس التلفزيون. شنو غايدير خونا؟
غادي يبيع النصيب ديالو فشركة Sigma لصديقو دينو السبتي.. وغادي يخرج محمد رزق الشريك الثالث من الشركة هو والسيدة هيندا السقال لي كانت المديرة التجارية معاهم فالشركة، وغادي يأسسوا شركة Image Factory … يعني المؤسسين ديال إيماج فاكتوري كانوا بزوج مسيرين ديال شركة سيكما لي أسسها العرايشي مع دينو السبتي ومحمد رزقي.. ومن يوم تأسست إيماج فاكتوري عام 2004، وهي تتحصد فالملايير من قنوات القطب العمومي لي كيترأسو العرايشي.. شركة وحدة تخدم وتضرب الملايير فالصفقات ديال التلفزيون، والشركات لي ما عندهاش لي يفتح ليها الابواب، تبقى تتفرج من الشرجم فالوزيعة لي تتفرق على الصحاب.
هاد الشركة أسيادنا حققت فرقم معاملاتها 22 مليون و764 ألف درهم مقابل إنتاجات برامج رمضان 2018، و26 مليون و232 ألف درهم مقابل إنتاجات رمضان 2019، و14 مليون و940 ألف درهم مقابل إنتاجات أخرى سنة 2019…. 6 مليار ونص داتو شركة وحدة فأقل من سنتين!!!
هاديك التلفزة رديتوها دار الورثة وعنوان للتفاهة والرداءة، ولي باقي كايتفرج فيكم سرو نيت، نفس الكمامر الحامضة كل عام، وجوهكم ولات فحذ ذاتها عقوبة للمغاربة…
أودي قالوها ناس زمان: المال السايب تايعلم السرقة.
سير على بركة الله…
