أ….الغيطة والطبل …وا…. الهيت .
الوطن 24/ زجل بقلم: الشاعرة المغربية الأندلسية نادية بوشلوش عمران
1
وا العروبي ….
وا الغرباوي….
آتا، فين جاي؟؟؟؟
واتا
فين سابق لكلام؟؟؟؟
وا فين جاي و فين غادي؟
مخلي الدوار
ناسي لمرا والأولاد
في الݣارة
وجاي بلا شوار
البردعة والحمار
ما ساݣي ما
ما حارث، ما زارع درا
2
أنا جاي، وناسي الهم في الݣاعة
دواري، مات وحيا
دموع الدم، طايحة من السما
ليمامة طارت وبكات
لمرا، ما ساقت للدنيا خبار
انا جاي بعجاجتي مطير الغبار
وا موي
الݣيلة حامية
وا موي
والدنيا بيا دوارة
الكارة شاعلة
مكتوبي، هذا با موي
مكتوبك هذا يا ولدي
واه يا اسيادي
وراني مزاوݣ
مكتوبي
مكتوب بالسمق
بالريش وبالأقلام
على لوح صلصال
في بيد لإمام
لي شرا شرا
ولي باع باع
ووزني باعوا الكيال
3
ستف هيتف
غبار الأݣدام حامية
عاشݣة ݣايدة
راني غريب وبراني
وݣلبي مهاوش
وݣلبي مناوش
عاشݣ شجرة التوت
عاشݣ وعليها
أودي تنموت
على الهيت الغرباوي
هيت بني حسن
راني عليه داوي
وݣلبي عليه مداوي
كلام الطبة
لي ݣالوه الطلبة
وشيروا عليه بالحكمة
جيبوا لي يا سيادي الحنة
حني ݣدامي
نتمردغ ونطيح
نوض ونوقف
ونتحير ونشطح
نشرب بلساني
مقراج سبولة حامي
أنا يا سيادي
غرباوي مجنون
مجذوب
آه يا سيادي
آش إلا بقبت بلا هيت
نساوي
شوية ݣروش ولا موزنات
ولا ريالات ولا جوج فرنكات
جاي يا سيدي من الدوار
نشطح ونهستف
بقشابتي وببلغتي
برزتي وبسلهامي،
بشكارتي
نطلع ونهود
ندݣ ندݣ التراب
على ݣلبي
نبرد ݣلبي
وا الهوايش
وا لهوايش
نشطح ونعاود
ندردݣ ونزيد
نتحير، نتمردغ ونطيح
اااهاوه اه اه اه
راني يا سيادي غرباوي
مهاوش
عاشݣ مجذوب
شطح هشتف
وا زيد دردرك
ݣلبي محروݣ
بنار الكية داتني
ليه بنت بني حسن
آه راني مزاوݣ
في سيدي ادرويش
مول الرزة،
آه راني مزاوݣ
في سيدي بن عيسى
وا سيدي يحيا
وا سيدي علي بجنون
واراني مزاوݣ
آه راني مهاوش
وا الهيت
وا البنادر
وا التعارج
وا المزامر
والغيطة
والطبلة
آتشف هيتف
زيد. دردك
آسيدي، حمي الگارة
أسيدي غني وشطح
الهيت الهيت الهيت
